الرئيس السيسى: مراكز البيانات ما بتنضربش بالقنابل.. وانتوا بتدخلوا ولادكم آداب وتجارة وحقوق هيطلعوا يشتغلوا إيه؟.. وفيه وظايف ممكن الشباب يشتغلها فى البيت ويكسب 100 ألف دولار شهريا

شهد الرئيس عبدالفتاح السيسي، افتتاح مركز البيانات والحوسبة السحابية الحكومية بطريق العين السخنة.

ويعد هذا المركز الذي يقدم خدمات تحليل ومعالجة البيانات الضخمة – الذكاء الاصطناعي الأول في مصر وشمال إفريقيا طبقا لأحدث التقنيات العالمية.

قال الرئيس عبدالفتاح السيسي، إن 90% من الكابلات البحرية الموجودة فى العالم تمر عبر مصر، مضيفا: “إحنا قصدنا نحط شريحة معينة (7/20 ) علشان نقول، الفكرة كلها إن إحنا موجودين فيه النهارده إن لينا موقع كويس قوي ممكن نستفاد منه، وبالفعل بدأنا في ده من سنين طويلة فاتت وهو موضوع الكابلات البحرية اللى بتعدي 90% من الموجود في العالم عندنا، بالتالي لما نيجي نتكلم إن مصر نقطة أو محور رئيسي لنقل البيانات والاتصالات بين الشرق والغرب وده اللى أتاحه لنا موقعنا”.

 

أضاف الرئيس السيسي :”لما تيجي تشوفوا حجم الأرقام اللى أنفقناها.. دي أرقام كبيرة قوي.. بنتكلم عن مليارات الدولارات.. كتير مننا ما يحسش بالكلام ده يقولك يعني صرفتوا ده كله علشان أيه؟ طيب كمواطنين والدنيا غالية علينا نستفاد أيه؟ نستفاد إن إحنا نجهز بلدنا بالانطلاق الحقيقي”.

 

وأكد الرئيس عبدالفتاح السيسي، إن الدولة استهدفت توفير التكلفة المالية التي تدفع في استضافة بياناتنا في الخارج، معلقا بالقول: “إحنا كدولة كنا من ضمن الحاجات اللى بنعملها قالوا استضافة للبيانات لا إحنا دلوقتي كنا بنودي بياناتنا تبقا موجودة بره.. ده نظام موجود في الدنيا بس قولنا نوفر التكلفة المالية”.

 

تابع الرئيس الرئيس السيسي خلال افتتاح مركز البيانات والحوسبة السحابية الحكومية: “بدأنا نبقا في الريادة من 2018 وإحنا بنعمل العاصمة قلنا لا بد إن إحنا كل وزارة عاملة نظام خاص بيها عندها سيرفراتها في مبنى الوزارة، لما جينا عملنا الانتقال في مكان جديد ما كانش مباني جديدة يبقا شكلها كويس، لكن عملنا معايير طبقا للموجودة في العالم، وكان توجيهنا إنه يبقا معمول مراكز بيانات وقلت ما حدش هيروح يعمل مركز البيانات يبقا واحد ويبقا متصل بالحكومة ومش هيبقا نهايات طرفية فقط لانها هتبقا في مكان مؤمن تأمين كامل.

 

 

قال الرئيس عبدالفتاح السيسي، إن هناك دولة لا يتخطى عدد سكانها 7 ملايين نسمة وتمتلك 700 ألف شخص يعملون في البرمجة المدمجة، مضيفا: “مصر فيها 105 ملايين لا تمتلك 150 ألفا”.

 

 

 

أضاف الرئيس السيسي خلال افتتاح مركز البيانات والحوسبة السحابية الحكومية: “قاعد بتشتغل بتعمل إيه وبتجيب كام؟.. لما هتجيب كتير هتصرف على نفسك وأسرتك ويبقى عندك عربية تشتريها وناس تخدمك.. لكن لما تشتغل ودخلك بسيط يا دوب عاوز تاكل.. أنا النهارده كمصري مبقاش معذب إن أبقى آلاقي عندي 105 ملايين أطلع من كل مليون بألف في البرمجة وأنا عندي 65 % من السكان شباب وشابات”.

 

تابع الرئيس: “بفضل الله سبحانه وتعالي ومن كرمه عليا بأعمل اللى ما حدش يفكر فيه ولا أنا غلطان؟ اللى ما حدش يفكر فيه كمسؤول في الدولة، لو كنت مشيت على قبل 2018 كنت هجيبه منين؟ وأصرف عليه منين؟ وبعدين هطلع إمتى العوايد بتاعتها”.

 

واصل الرئيس: “كتير من الناس تقول ما لوش لازمة، هو انتم مش عاوزينا نحلم ببلدنا تاخد مكان يليق بيها ويبقى فيها إمكانيات لنمو حقيقي .. في دور أنا أعمله وفيه دور إحنا هنعمله .. والله العظيم بدون مبالغة الدور اللى بأعمله بقول دايما ربنا لأنه ربنا شرفني وعزني وكرمني ودايما بيراضيني ويساعدنا إن إحنا نعمله.

قال الرئيس: ما تلومونيش انا بس .. أنا ألومكم انتوا كمان معايا، لكل اسرة مصرية الكلام ده قلت من 4 سنين والدكتور خالد عبدالغفار زعل جدا مني وإزاى تقول إن إحنا ما عندناش في التعليم العالي غير 111 شخصا عملنا ليهم اختبار علشان نجيب من شريحة المتعلمين الواحد كان هيتكلف 60 ألف دولار علشان يتعلم التعليم ده .. والله لو النهارده لو فيه ألفين أو 3 مستعدين ناخده وأعلمه طيب تيجي إزاى؟.

 

أكمل: “قاعدين كلكم تدخلوا ولادكم آداب وتجارة وحقوق مع كل الاحترام طيب هيطلع يشتغل إيه؟ وتقول ما ما بيشغلوناش ليه؟ والابن يبقى زعلان مني وزعلان من الحكومة؟، طيب يروح يشتغل مدرس ده.. أنا بقول لك على وظيفة هتشتغلها وأنت في قاعد بيتك وممكن تعمل 20 – 30 ألف وممكن توصل لـ 100 ألف دولار في الشهر”.. الحكومة سياسات وهى اللى بتعمل ده، صحيح إحنا بنعمل استراتيجيات وسياسات بتتنفذ والحكومة بوزارتها تعمل لكن لو ما كناش كلنا مع بعضنا فاهمين الفكرة علشان نركز فيها تركزوا على إن الابن يجيب مجموع كويس يدخل طب وهندسة ولكن خلوا بالكم إذا كان عندك 25 مليون في التعليم الأساسي ما حدش يبقى “متنحرر” في المدرسة يشوف ويقول الولد اللى في ابتدائي وإعداداي خدوه وعلموه التعليم ده..عندي 4.5 مليون في الجامعة حطوا عنيكوا على الكلام ده علشان ننقيهم وندربهم ونجهزهم علشان بدل ما يبقى في 2030 يبقى 9 ، 9 إيه؟ أنا عاوز 90 ..بكلمكم علشان انتوا أهلي وناسي ودي بلدنا كلنا تنسوا نفسكم وتفكروا فيها هي علشان البلد يبقتى ليها مكان كبير”.

 

 

تابع الرئيس: “الصالات دي ما حدش مسموح يخش والناس اللى بتبقا موجودة بره الصالات دي..الكلام ده حرصنا على إنشاء رقمنة في مصر تحقق لنا التقدم المطلوب ومانبقاش متخلفين عن الآخرين باستفادة ضخمة دا لانا تصوروا لو الحكومة بتعمل بينها وبين بعضها تستطيع أن تعمل من خلال الحواسب وتبادل المعلومات مع باقى الوزارات المختلفة”.

 

قال الرئيس عبد الفتاح السيسي، إنه في ظل إنشاء مراكز البيانات والحوسبة السحابية وغيرها يتغير شكل وحجم وسرعة العمل في الحكومة، متابعا: “ده كله له تكلفة والتكلفة تخص لو ما كناش عملناه.. الأرقام اللى اتكلفت بيها الموضوعات دي في مراكز البيانات كبيرة”.

أكمل الرئيس:”مدينة العدالة في العاصمة الإدارية الجديدة.. اتعرض عليا التخطيط وبعد العرض قولت طبقا للمعايير المناسبة أن المدينة تكون رقمية ودخلت الشركة وعلشان تعمل دي رقمية وقالت إنها هتحط تعديلات على الكلام ده والطلب ده.. وحصل تعديل كبير جدا على التصور الهندسي لمدينة العدالة وده بيخلي حجم العمل داخل المدينة وزي ما الحكومة شغالة وتشتغل أكثر.. الأداء سيكون أكثر تقدما وتطورا وأكثر جودة لينا”.

 

وتابع الرئيس السيسي: “تفتكروا الرقم لرقمنة مدينة العدالة.. بقول كده للناس في مصر.. انتوا بتقولوا صرفتم كتير.. انتوا بتصرفوا كتير ليه؟ هو أنا عندي خيار تاني.. يبقي زي مخاليق ربنا اللى موجودين في الدنيا هنبقي متخلفين.. إحنا دولة مش غنية.. ولو مش عملنا الكلام ده”.

تحدث الرئيس عبد الفتاح السيسي، عن فرص العمل المتاحة والكبيرة في مجال الاتصالات وتكنولوجيا المعلومات، متابعا: “ده أكبر قطاع ممكن، وبقول الكلام ده للمصريين والناس اللى بتعلم ولادها من الكلام ده.. بلد فيها 106 ملايين.. العنصر البشري المطلوب فيها قليل.. أرقام غير خالص اللى الدكتور عمرو طلعت وزير الاتصالات فرحان بيها.. مصر لو عندها كوارد بشرية متقدمة وهو بيتكلم هنا عن التعهيد.. ممكن أوى وما خرجتش عن المحاضرة والكلام بتاعنا”.

 

واصل: “بنبه المصريين لتعليم ولادهم في مراكز للثانوية العامة.. علشان يتعلموا التطور التكنولوجي.. فرص بتوفر 20 و30 و40.. المجال ده عاوز مليون كل سنة.. إحنا في مصر فين؟.. ما جرحتش عن الكلام ده.. إحنا بنعمل حاجات كتير أوي وكتير من الناس البسطاء مايعرفوش.. ولاد في إعدادي وابتدائي دلوقتي.. خليكم في اللى بنتكلم فيه.. على المستوي الثالث “البرمجة الحديثة” يعمل بـ 100 ألف دولار في السنة”.

 

تحدث الرئيس عبد الفتاح السيسي، عن جهود الدول في دعم الوظائف التكنولوجية الحديثة التي توفر أموالا طائلة، متابعا: “من غير ما أجيب أسماء دول.. فيه دول عندها عدد سكانها بسيط جدا جدا لا يتعدي الملايين بعدد أصابع اليدين.. وبتعمل في المستوي الثالث من الوظائف التكنولوجية الحديثة أكثر من نصف مليون شخص.. وممكن 750 ألف دولار.. يعني 700 ألف ولا 500 ألف شخص شغالين في المجال ده.. وكل واحد بيعمل 100 ألف دولار.. يعني 70 مليار دولار.. ده عقل.. لا عاوز مصنع ولا حاجة خالص.. ده عاوز دماغ وحاسب”.

 

وأضاف الرئيس السيسي:”فيه دول تانية عددها 3 ملايين وعددها كبير والمستوي الثاني.. احنا شغالين في المستوي الأول.. اللى بيجب قد إيه وعددنا إيه؟؟.. هدفي أني أشاور لنفسي والناس اللى عندنا للحكومة والتربية والتعليم والتعليم العالي والإعلام والمفكرين والمثقفين.. 95 % من الصحراء فاضية مفيش حاجة.. مفيش غير الإنسان.. طب أنت مهتم تعلمه إيه؟.. هتقول لي أنت بتعلم.. عاملين جامعات وكليات وبرامج بعدد ضخم ونستهدف أرقاما من وجهة نظر الدكتور عمرو طموحة جدا ومن وجهة نظري متواضعة جدا.. عاوزين نخرج من اللى إحنا فيه”.

 

وتابع الرئيس السيسي: “6 مليارات دولار ولا 4 مليارات دلوقتي.. أنا عاوز 100 و200 و 300 مليار دولار.. مصر دولة كبير وطلبتها كتير ومش هتقدر تنتج كل الطلبات… وتقولوا الحاجة غالية.. وكل إنسان ومدير مدرسة وعميد كلية كان في دماغه ده ويقعد في برامج مع الشباب علشان يشوف منهم اللى عنده استعداد أكثر المعدلات اللى حاططها معدلات النمو السكاني أكبر من المعدلات دي”.

 

وقال الرئيس عبدالفتاح السيسي، إن التكنولوجيا المستخدمة في مراكز البيانات والحوسبة السحابية متقدمة للغاية.

 

وأضاف الرئيس السيسي:”المعمول ده أنا مش بتكلم عنه كتير لأسباب خاصة.. لكن المعمول ده من ناحية التقدم فوق خيالكم، وفى بلد زي مصر ماتعملوش ولا تفكر فيه لأنها غلبانة.. تجيب منين يعني؟ .. لكن عملناه، فيه حاجات من اللى موجودة دي .. موجودة تحت الأرض ما تضربش بأى نوع من القنابل”.