رسالة تهنئة من والد ياسمين صبري لابنته نرمين كلها تهزيق لياسمين!

 

أشعل والد ياسمين صبري الدكتور أشرف صبري، وسائل التواصل الاجتماعي بارسالة التي وجهها إلى ابنته نرمين ، ورغم أنه يهنئ نريمين لوضعها مولودا جديدا، فقد جاءت الرسالة من أولها لآخرها وكأنها موجهة إلى ياسمين وليست نرمين.. وجاء في نص الرسالة:

ألف مبروك لوصول حفيدي الثاني من ابنتي الغالية نرمين مبروك ياحبيبتي وربنا يحفظك ويحفظ ولادك ويتربوا في عزكم انتي وأبوه الدكتور الجميل المحترم وعقبال بلال منتظر حفيدي منه هو وبنتي المحترمة أريج بنت الناس الراقية المحترمين ربنا بيدي كل واحد على أد نيته ربنا اداكم الهدوء والسكينة والأولاد زينة الحياة الدنيا والهدوء والعمل أغلى من أي شيء أغلى من كنوز الدنيا اللي بتغري ناس كتير وبتحرمهم الراحة والهدوء لأنهم افتكروا ان الأموال أهم من العيلة والهدوء النفسي فاتزلزلت نفسيتهم وربنا حرمهم من نعمة عظيمة الأولاد والبيت والحب وأصبحوا بدون حب ولا حياة ولا عائلة ولا طمأنينة كل امنيتي ربنا يهدي المريض وينقذه من نفسه

المعروف أن هناك خلافات عميقة بين ياسمين ووالدها الذي يتهمها بالتنكر لأسرتها، والكذب والادعاء وحب المال.

قالت ياسمين صبرى : الكون ده عبارة عن “مينيو، قائمة”، وأنت اللي بتختار لنفسك ومحدش بيفرض عليك حاجة، فكر بنفسك واحسبها ثم توكل على الله واختار، أنت لما بتحب حاجة الكون كله بيتسخر لك، وكل حاجة بتحبك لما أنت تبدأ تحب نفسك الأول.

وأضافت ياسمين صبرى: لما تطلب من ربنا الكبير اطلب كتير، احنا نستاهل نكون في مكان أفضل، ونستحق كل حاجة حلوة في الدنيا، طبعًا لازم نسعى ونحلم، لأن اللي مبيحلمش دا شخص ميت.

وقالت ياسمين صبرى: كنت طفلة لا أملك كل ما أحلم به، كنت بتمنى أملك ملابس وأحذية جميلة، وقتها تخيلت ودربت عقلي الباطن على التخيل ده دون أن أدري، وعندما كبرت الأمر تطور معي وأصبحت بدرب نفسي على تخيل أحلامي وطموحاتي الأكبر.

وأضافت ياسمين صبرى: كنت أنتمى لطبقة متوسطة، وقد درست فى فترة من حياتى فى إحدى المدارس الحكومية، وكنت أذهب إلى تمرين السباحة مشياً على الأقدام، وحينها كنت أتخيل أننى أملك أجمل الأشياء فى الدنيا، سواء من ملابس أو شقة فاخرة أو سيارة.

وتحدثت ياسمين صبرى: كل مرحلة هتوصل لها هيكبر حلمك معاك، أحببت نفسي جدًا، ولهذا مختلطش بأشخاص ملهمش لازمة، كنت بشوف أني أستحق الأفضل، وأقول كيف أسعى للأفضل وأنا بورط نفسي في أشياء بتهين نفسي وتقلل من شأنها.

وتسببت تصريحات ياسمين صبرى، فى إثارة غضب والدها الدكتور أشرف صبرى، وكتب عبر صفحته الشخصية “فيسبوك” قائلاً: “دي المدرسة اللي اتخرج منها بناتي اللي واحدة منهم بتدعي إنها كانت في مدارس عربي، وعاشت حياة بائسة فقيرة، وإنها وصلت بمجهودها! هو الكذب في حد يوصل للدرجة دي؟ أنا أفهم الكذب لما تبقي غلبانة وتكذبي”.

وأضاف والد ياسمين صبرى: ” قولي أنا من عيلة كبيرة ومدارس أجنبية وعشت في سرايا وبابي كان وزير وهو بيشتغل عامل! يبقي كذب له مبرر! لكن إن واحدة اتولدت لها شغالة فلبينية بتلبس من باريس لأني كنت باجيب لها لبسها من هناك ودخلت مدرسة الـ EGC أرقي مدارس إسكندرية في وقتها”.

واستكمل والد ياسمين صبرى: “وعاشت في فيلا بحمام سباحة وصالة جيم، ولها غرفة خاصة بحمامها وكانت بليدة وطلعت روحي، ويا دوب تنجح بالعافية بخمسين في المية، وكانت بتروح الكلية بالعافية واصحيها الصبح بالساعة عشان تروح الكلية”.

وتابع والد ياسمين صبرى: شهاداتها عندي كلها كحك وأبوها دكتور.. تطلع تدعي إنها عاشت حياة بائسة وغلبانة وبتكمل باقي الشهر من غير فلوس! ايه الكدب والفيلم المتخلف ده انتي عايشة دور تمثيل ورثاه من جد والدتك سيد سليمان. وبتكدبي ليه؟.. حتاخدي نشان يعني علي خيبتك وفقرك وصلتي وبقيتي حاجة؟ انتي بالنسبة لابوكي حتة عيلة مش فاهمة بتعملي ايه غير انك بتشوهي اللي رباكي عشان الناس تسأفلك.. حتي اخوكي بهدلتيه اللي طول عمره جنبك وبيجي من آخر الدنيا عشانك! ياشيخة بطلي اللي انتي فيه ده وحسبي الله ونعم الوكيل فيكي. بطلي تجيبي سيرة عيلتك أبوكي اللي رباكي منك لله.