صيانة فورية للضهر زي الموبايلات كده.. أحدث عيادات النصب في مصر وعلى عينك ياصحة!
عادي أن تقرأ لافتة تخبرك عن ورشة لصيانة السيارات أو الغسالات أو المراوح، لكن غير العادي أن تعرف من اللافتة أن هناك ورشة لصيانة الظهر، لأ وإيه صيانة فورية، يعني مش ح تسيب ضهرك وترجع تاخده بعد يوم ولا اتنين!
بالتأكيد لن تجد هذا الإعلان أو هذه اللافتة إلا في مصر المحروسة التي تغيب فيها الرقابة دائما عن أي شيء، وتدع كل واحد يعمل إللي هو عاوزه.
صيانة فورية للظهر هذه هي أحدث أنواع العبث في مصر، أعلنت عنها إحدى العيادات في مدينة نصر، يقول لك الإعلان:
عمرة فورية لظهرك ح تخليه يرجع زي زمان
لو ضهرك وجسمك تعبك ومحتاج تعمل له عمرة فورية ومن أول وجديد يبقى لازم تجرب جلسة الصيانة متكالمة للضهر والجسم ، بعدها ح تحس إن ضهرك رجع زي زمان
كتير مننا مايعرفش إيه هي جلسات الاستشفاء
جلسة الريكفري ح تساعد في:
تقليل التوتر العضلي والألم
تقليل ألم العضلات الفوري
تعافي الأنسجة العميقة
تعزيز حالة الاسترخاء
تحرير العقد العضلية
تخفيف التوتر العضلي المتزايد
تقلل التوتر وتنشط الدورة الدموية
ح تخليك فريش من أول وجديد
في انتظاركم تشرفونا في داما كلينيك
انتهى الإعلان الغريب والعجيب، ويطرح السؤال نفسه: أين وزارة الصحة من هذه العبث، وهل هناك في الدنيا حاجة اسمها صيانة فورية للضهر..مايكونش الضهر ده موبايل مثلا واحنا مش واخدين بالنا.
